Giura


Il chantun Giura ha mantegnì per gronda part ses caracter rural. Perquai vegnan celebradas anc oz las pli diversas tradiziuns. Ellas expriman ina colliaziun speziala cun la natira e cun il ritmus da las stagiuns, dentant er cun las abilitads professiunalas ch'èn vegnidas sviluppadas sur tschientaners dals mastergnants da la regiun. Ina spezialitad da questa regiun è ses patrimoni linguistic atipic. Il chantun Giura è il sulet chantun da la Svizra cun in dialect che tutga tar la lingua d'oïl. Da questa lingua, che vegn er discurrida en il Franc Contadi cunfinant, datti differentas variantas. Ella fa part da las linguas romanas ch'èn naschidas oriundamain al nord da la Gallia sut influenzas celticas e germanas. Cun l'intent da mantegnair questa diversitad linguistica è vegnida creada tranter auter ina pagina d'internet («Djâsans - Patois Jurassien»). Questa pagina propona activitads e cuntegna ina collecziun da dicziunaris per garantir che las enconuschientschas linguisticas vegnian transmessas, ma er numerusas paraulas, chanzuns ed ulteriuras infurmaziuns interessantas.

En general s'engaschan differentas uniuns privatas e publicas per mantegnair la cultura regiunala. Il chantun Giura sa participescha a quellas cun contribuziuns a basa da l'artitgel 42.2 da sia constituziun chantunala. Quest artitgel prevesa ch'il chantun e las vischnancas procurian e gidian a mantegnair, a derasar ed ad applitgar il patrimoni cultural giurassian, cunzunt il dialect. L'uffizi chantunal da cultura è l'uffizi chantunal cumpetent en chaussa. Grazia ad ina collavuraziun cun l'organisaziun Djâsans datti curs da patois per ils scolars giurassians.

In decurs da l'onn en il ritmus da las tradiziuns

Blers usits e bleras isanzas dal chantun Giura han in connex cun ils firads e cun las stagiuns. Il decurs da l'onn cumenza cun ils giavischs da Bumaun, gia prest suondan ils buns giavischs da Bavania che vegnan exprimids dals uffants. Pauc pli tard porta il tschaiver vita en ils vitgs: A Le Noirmont ed en las Francas Muntognas vegn el festivà sco «Carimentran», en auters lieus sco «Rai-tiai-tiai» u «Brandons». Alura suondan las enconuschentas sgnoccas dal 1. d'avrigl. Pasca ha survivì tant dal puntg da vista religius sco er areguard sias isanzas da primavaira. Sessanta dis suenter Pasca vegn celebrà Sontgilcrest: Quest firà regorda la preschientscha fisica da Cristus en il sacrament e la conversiun da paun e da vin.

La primavaira festivescha er Delémont la tradiziunala «Danse sur la Doux» che cumpiglia in martgà e numerus stans d'ustaria en sias giassas e sin sias plazzas, entant che Pruntrut organisescha ses martgà, la «Braderie», l'atun. Suenter avair terminà las lavurs da champagna suonda mintgamai la festa da Son Martin cun sias buntads culinaricas. Questa festa fa endament ch'ils purs avevan per disa da mazzar in portg durant l'emprima mesadad da november. Il cumenzament da l'enviern s'avischina la festa da Son Niclà cun ses regals e cun ses cortegis, avant ch'il cirquit da l'onn sa serra cun la festa da Nadal.

Durant l'onn han er lieu en il chantun Giura numerusas festas da musica instrumentala, pliras festas dals chors cecilians, a las qualas sa reuneschan mintgamai plirs chors da baselgia tant sco divers festivals e festas da musica actuala. Questa dinamica culturala e quest stretg liom cun las stagiuns èn las caracteristicas centralas da l'identitad tradiziunala da la regiun. Ils Giurassians, colliads cun la natira e cun ses mitus, han dapi adina consultà guariders per curar u per mitigiar tschertas malsognas, sco per exempel arsas, variclas e mal il chau. Els n'han mai chalà cun questa pratica.

Abilitads multifaras

Las tradiziuns dal chantun Giura cumpiglian er differentas abilitads caracteristicas d'in artisanadi gist uschè ritg sco diversifitgà. Latiers tutga natiralmain l'art d'urer, la pitga da l'industria regiunala. Quest art è la basa per numerusas professiuns tecnicas ed artisticas: dal designer, al spezialist per lavurs d'emagl, da madraperla e da pedras preziusas fin al maister urer. La gronda reputaziun che la fabricaziun d'uras ha dador ils cunfins da la Svizra na fa betg loschs mo quests professiunists, mabain tut la populaziun da la regiun.

Il chantun Giura è er la tgina da l'ultima razza da chavals da la Svizra: Qua vegn allevà il freiberger, il chaval da las Francas Muntognas da statura mesauna ch'è enconuschent per ses caracter obediaivel. El è l'ultim represchentant dal chaval da trair en l'Europa dal vest. Sin questa tradiziun ch'è documentada en las Francas Muntognas dapi il 17avel tschientaner, sa basan anc oz bleras professiuns, blers usits e bleras occurrenzas.

Autras cuntradas sco la Val Terbi e la Haute-Ajoie èn adattadas per la cultivaziun da pumers. Da La Baroche deriva l'enconuschenta «Damassine»: Quest vinars che pretenda abilitads da producziun tut spezialas fascinescha tras sia savur chauda e tras ses gust da palogas selvadias, cuntegna ina nota ervusa ed ina idea da mandels amars.

Referenzas