Tessin


En il Tessin na a nivel chantunal ni mesiras spezialas ni instituziuns u autoritads responsablas directamain u exclusivamain cumpetentas per intermediar e per promover il patrimoni cultural immaterial. Il «Centro di dialettologia e di etnografia CDE» (Center da dialectologia e d'etnografia) a Bellinzona documentescha però, perscrutescha e renda accessibla la situaziun linguistica ed etnografica da la Svizra taliana. Il CDE collavura er cun las medias e fa emissiuns per in public vast. Ultra da quai promova el exposiziuns, dietas e referats che han in connex cun las relaziuns localas. El coordinescha er las activitads dals diesch museums etnografics renconuschids dal chantun ed als dat in sustegn scientific e tecnic.

Archivs

Dals differents archivs dal Tessin è segiramain l'«Archivio di Stato» (Archiv chantunal) l'instituziun decisiva. Ultra dals divers servetschs culturals administrescha l'archiv er il «Repertorio toponomastico ticinese RTT» (Repertori toponomastic dal Tessin) che registrescha, mantegna e render accessibels ils nums dals lieus e da la cultira. Ils toponims vegnan inventarisads a basa da fonds bibliografics, documentars e cartografics sco er a maun d'intervistas precisas cun infurmants dal lieu.

Sin plaun local sto vegnir menziunà er l'«Archivio Audiovisivo di Capriasca e Val Colla ACVC» (Archiv audiovisual da Capriasca e da la Val Colla) che s'engascha – cun agid d'ina registraziun per gronda part sistematica da fotografias privatas e da perditgas oralas da la regiun, surtut da natira istorica ed etnografica – per la revalitaziun dal patrimoni cultural immaterial. Er l'«Archivio della Memoria di Arogno ADMA» (Archiv dad Arogno) che vegn tgirà da la vischnanca dad Arogno è in instrument per mantegnair las caracteristicas istoricas, economicas e socialas da la regiun. El collecziunescha perditgas oralas, fotografias e documents.

Tegnair en salv e dar access als bains culturals acustics da la Svizra fa la Fonoteca nazionale (Fonoteca naziunala) a Lugano. Questa instituziun è vegnida fundada l'onn 1987 sco fundaziun da dretg privat. Ella collecziunescha e documentescha portatuns che han ina relaziun cun l'istorgia e cun la cultura da la Svizra. Da quai fan part tant documents musicals sco er documents discurrids. La Fonoteca documentescha er registraziuns dals secturs musica classica, rock, jazz, musica populara, cudeschs auditivs, raquints, teaters, intervistas e.u.v.

Musica, saut e teater

La federaziun «Gruppo di lavoro artigianato del Ticino GLATI» (Gruppa da lavur per l'artisanadi dal Tessin) è vegnida creada l'onn 2000. Ella duai rinforzar la responsabladad da las differentas uniuns artisanalas per lur sectur, en spezial areguard la promoziun e l'intermediaziun d'infurmaziuns tenor la «Legge cantonale sull’artigianato del 18 marzo 1986» (Lescha chantunala davart il mastergn). Ils commembers da la federaziun duain er observar la Convenzione sul marchio «Artigianato del Ticino» del 2 dicembre 1991 (Convenziun davart la marca «Artisanadi dal Tessin»). Las suandantas uniuns èn commembras dal GLATI: «Associazione Pro Verzasca», «Associazione del cotto ticinese» (Uniun tessinaisa da la vaschlaria), «Associazione artigiani di Vallemaggia» (Uniun da la mastergnanza da la Val Maggia), «Associazione artigiani bleniesi» (Uniun da la mastergnanza da la Val Blenio).

La «Federazione Cantonale del Costume Ticinese FCCT» (Associaziun chantunala da costums dal Tessin) è vegnida fundada l'onn 1937. Ella examinescha e conserva costums, sauts populars e musica populara sco er isanzas e tradiziuns dal chantun Tessin. Actualmain fan 19 gruppas part da la FCCT, sco per exempel l'«Associazione Costumi Vallemaggia» (Associaziun da costums da la Val Maggia), il «Gruppo Canzoni e Costumi Ticinesi» (Gruppa tessinaisa da chanzuns e da costums), ils «Canterini di Lugano» (Chor popular da Lugano), il «Gruppo Costumi Chironichesi» (Gruppa da costums da Chironico), il «Gruppo Costumi della Pro Valle di Muggio» (Gruppa da costums Pro Val Muggio) ubain il «Gruppo Costumi Valcolla Lugano» (Gruppa da costums da Valcolla Lugano).

Er en il sectur musical emprovan ins da dar en il Tessin dapi intgins decennis vastamain e sistematicamain nova vita al patrimoni cultural tradiziunal. L'onn 1983 è vegnida creada la gruppa da musica populara «Vox Blenii». Questa gruppa recurra a l'experientscha ed a las cumpetenzas da las abitantas e dals abitants pli vegls e rimna uschia las chanzuns e las tradiziuns musicalas oralas da las vals dal nord. Il stil da «Vox Blenii» permetta d'improvisar, resta dentant tuttina fermamain enragischà en la cultura populara tessinaisa. L'october 1988 ha Vox Blenii organisà ina festa da musica populara che ha durà trais dis. A questa festa èn sa participadas cunzunt er musicistas e musicists da l'Italia.

Er ils «Tre Tèr» gidan a perscrutar ed a mantegnair il repertori tradiziunal da la musica tessinaisa. Questa gruppaziun reunescha musicists da la Val Onsernone, dal Centovalli e da la Mesolcina. Er il duo Vent negru da Locarno suna dapi l'onn 1991 chanzuns e musica cunzunt da la Val Onsernone, surpassa dentant er ils cunfins naziunals fin en la Lumbardia, en il Piemont, en la Provence e.u.v.

In’attenziun speziala merita il «Fondo Roberto Leydi», che vegn tegnì en salv en il CDE a Bellinzona. I sa tracta d'ina donaziun impurtanta che cumpiglia ina ritga collecziun sistematica da material davart la musica e la cultura populara. Il fond è resultà da las numerusas retschertgas da Roberto Leydi (1928-2003) ed a basa da ses inscunters cun musicists, cun mastergnants e cun differents infurmants. Er la vasta experientscha da Leydi sco docent a l'universitad, ses engaschament intensiv durant passa 50 onns e diversas relaziuns persunalas han pussibilità questa collecziun d'instruments da musica, da plattas da grammofon, da registraziuns sin bindel magnetic, da partituras, da cudeschs, da periodicas e da dissertaziuns davart temas musicals ed etnologics.

La purschida musicala vegn cumplettada considerablamain dals numerus chors e da las numerusas gruppas da musica cun lur vasts repertoris. Differentas secziuns da la «Pro Ticino» han per exempel agens chors e la finamira da derasar il chant choral en talian u en dialect sco er da far reviver la tradiziun da las chanzuns popularas tessinaisas u talianas.

En connex cun ils arts teatrals ston ins menziunar las stentas en il sectur dal teater dialectal: Dapi l'onn 1999 s'engascha il «Teatro Popolare della Svizzera italiana TEPSI» (Teater popular da la Svizra taliana) per mantegnair il teater popular ed en spezial er la tradiziun dal teater dialectal. En il Tessin datti numerusas gruppas da teater d'amaturs ch'èn s'unidas en la «Federazione Filodrammatiche della Svizzera italiana FFSI» (Federaziun per teater d'amaturs da la Svizra taliana) e che promovan represchentaziuns en dialect.

Autras isanzas

Il chantun Tessin ha annunzià en tut 17 tradiziuns a la gruppa da lavur da l'Uffizi federal da cultura. Diesch da questas tradiziuns fan part da la categoria «praticas socialas, rituals e festas», las ulteriuras set tradiziuns pon vegnir repartidas a la categoria «artisanat tradiziunal». Per l'emprima categoria ha il chantun Tessin proponì las suandantas tradiziuns: las processiuns istoricas a Mendrisio, la processiun da Gannariente en la Val Bavona, la fiera en onur dal Son Provino ad Agno, la festa da Son Martin a Mendrisio, la «Cagórda» a Lumino, il chant da Bavania a Capriasca, il tschaiver a Bellinzona, las milissas istoricas en la Val Blenio, la festa da vendemia a Mendrisio e la vigilgia da Nadal da Morcote. Per la categoria «artisanat tradiziunal» èn vegnidas fatgas las suandantas propostas: l'explotaziun e l'elavuraziun da granit en il district da Riviera, l'elavuraziun e l'entretschar strom en la Val Onsernone, ils brassamaruns, ils lainaris-miradurs spezialisads per la construcziun e per la restauraziun da tetgs, ils spazzachamins da la Val Verzasca (e da las ulteriuras vals dal alto Verbano), ils chalderers ambulants da la Val Colla ed ils brischa-arschiglia da la regiun dal Malcantone.

Autras isanzas che n'han betg pudì vegnir resguardadas sin la glista da las 17 candidaturas èn per exempel: la festa dal beà Manfred a Riva S. Vitale, «Bandir Gennaio», il tschaiver da Brissago, la festa da Son Giusep a Ligornetto, la processiun dal «Mercoledì santo» a Coldrerio, l'ingiant d'ovs a Vaglio, la festa da Son Roc a Gribbio, la festa da Son Murezzan ad Osco, la cursa da Mendrisio, la cursa da minicars a Porza, il gieu da boccias, la fiera da muvel en la Leventina u la fiera da nursas a Malvaglia.

Ulteriuras infurmaziuns


I na dat anc betg paginas d'internet spezialas davart l'inventarisaziun da las tradiziuns viventas en il Tessin. Dentant èsi stà pussaivel da mantegnair, da dar access, d'intermediar e da perscrutar a funs il patrimoni cultural immaterial da la regiun grazia al «Centro di dialettologia e di etnografia» a Bellinzona, schebain che quest inventari n'è betg ina incumbensa centrala da quest institut.

Ulteriuras infurmaziuns chattan ins sin la pagina d'internet dal «Osservatorio culturale della Svizzera italiana». La pagina d'internet dat ina survista da las activitads culturalas da la regiun. Ella descriva detagliadamain bibliotecas, museums, teaters, festivals ed uniuns da tut gener (d'uniuns archeologicas a gruppas folcloristicas fin ad uniuns da mastergnanza, a chors ed a gruppas da teater d'amaturs) per permetter in access optimal. Ulteriurs diesch museums etnografics renconuschids dal chantun porschan differentas activitads e differents programs tut tenor las stagiuns. Infurmaziuns detagliadas datti sin las paginas d'internet da las singulas instituziuns. Er intginas da las persunas che tgiran las tradiziuns vivas che vegnan descrittas en il dossier inoltrà al UFC possedan ina pagina d'internet.

Referenzas