Gronds dis da cursa a Berna – cursas da minicars a Berna


Sparta:
Praticas socialas
Chantun:

Descripziun

Ils gronds dis da cursa a Berna èn vegnids lantschads avant passa trenta onns da pionieras e pioniers da la lavur averta cun uffants. Dapi lura organiseschan las instituziuns ch’èn unidas en la Federaziun per la lavur averta cun uffants en la citad da Berna (DOK), mintga onn ina cursa da minicars al «Klösterlistutz» a Berna.

Construids vegnan ils sessanta fin novanta minicars a chasa en l’agen local da zambregiar ubain, a chaschun dals dis da zambregiar, en ina da las instituziuns dal DOK. Participar a la cursa pon sulettamain squadras, naginas cumbattantas singulas e nagins cumbattants singuls. Ils dis da cursa sa splegan l’emprima fin d’emna suenter las vacanzas da primavaira e duran da venderdi fin dumengia. La sonda han lieu las cursas da trenament. La dumengia daventi serius: En trais percurs – animads d’ina fulla d’aspectaturas e d’aspectaturs – filan ils uffants cun lur minicars dal cirquit oragiu. Quest cirquit è 500 meters lung ed è flancà da ballas da strom. Tar la festivitad finala vegnan surdadas pettas sco premis. Ultra da quai retschaivan tut las participantas e tut ils participants in document ed in t-shirt.

La cursa da minicars en la citad veglia tutga tar Berna sco l’Aara. Per bleras famiglias e per autras persunas che aman las cursas èsi in punct culminant da la primavaira che sa repeta mintga onn. Il «Klösterlistutz» sa transfurma per la durada d’ina fin d’emna en in cirquit da cursa giagl ed en ina plazza da festa. Ils gronds dis da cursa a Berna intgantan famiglias cun uffants che aman las cursas e cun uffants pitschens che restan cun bucca averta gist tuttina sco anteriurs, passantas e passants, turists e fans fidaivels. Er las fins d’emna da plievgia regia mintgamai in’atmosfera da festa populara paschaivla.

Dapi l’onn 2014 po la cursa da minicars vegnir manada tras sulettamain grazia a sponsuras, sponsurs, fauturas e fauturs. «L’Associaziun per la promoziun dals gronds dis da cursa a Berna» è vegnida fundada per rimnar mintga onn ils meds finanzials necessaris. Che quai è pussaivel, mussa quant numerus che las amias ed ils amis da quest eveniment èn.

Gallaria d'illustraziuns

  • Ils onns 1990 eri anc da s’annunziar per la cursa al «Waisenhausplatz» © Grosse Berner Renntage
  • Zambregiar minicars cun gronda premura l’onn 1989 sin la plazza da gieu al «Schützenweg» © Grosse Berner Renntage
  • L’onn 1990 vegnivan anc utilisads pneus vegls per francar ils cunfins dal cirquit al «Klösterlistutz» © Grosse Berner Renntage
  • Sin la plazza da gieu «Längmuur» zambregian ils uffants vi da lur minicars © Grosse Berner Renntage
  • En mintga cas in agid per construir e per reparar minicars: «Allgemeiner Ratgeber für Seifenkisten» (excerpt: «Rennstrecke») da Babu Wälti © Grosse Berner Renntage
  • Il cirquit cun ballas da strom al «Klösterlistutz» avant la cursa l’onn 1999 © Grosse Berner Renntage
  • Il cirquit dals gronds dis da cursa a Berna amez la citad veglia al «Klösterlistutz» © Grosse Berner Renntage
  • Examinaziun tecnica d’in minicar l’emprim di da cursa © Grosse Berner Renntage
  • Da gronda impurtanza tar ils minicars èn tranter auter la stabilitad, buns frains e la tecnica da manischar © Grosse Berner Renntage
  • Areguard la creativitad na datti naginas limitas – minicars sin lur plazza da spetga © Grosse Berner Renntage
  • Ils uffants ed ils giuvenils participeschan a la cursa en squadras © Grosse Berner Renntage
  • Mintgatant vai cun gronda sveltezza enturn la storta © Grosse Berner Renntage
  • Ils premis per las victuras ed ils victurs en las differentas categorias èn preparads! © Grosse Berner Renntage

Documents da video

Das Seifenkisten-Rennen 2016. © Grosse Berner Renntage

Das grosse Rennen. © Grosse Berner Renntage

Füdlerennen © Grosse Berner Renntage

Referenzas e dossier

Publicaziuns
  • Förderverein Grosse Berner Renntage: Projektbeschrieb Grosse Berner Renntage. Bern 2016

  • Henry Lehrman (Regie): Kid Auto Races at Venice. Keystone Studios, 1914 (Stummfilm mit Charlie Chaplin)

  • Babu Wälti: Allgemeiner Ratgeber für Seifenkisten. Bern, 2002

  • Julian & Glyn Bridgewater: Seifenkisten selber bauen. Schritt für Schritt. Übersetzt von Jörg-Rüdiger Sieck. Wien, 2010

Dossier