Cursa da skis internaziunala Inferno a Mürren


Sparta:
Praticas socialas
  • Expressiuns oralas
Chantun:

Descripziun

La cursa da skis Inferno è vegnida manada tras per l’emprima giada ils 29 da schaner 1928 ed è uschia ina da las pli veglias cursas da skis che vegnan manadas tras anc oz e la cursa d’amaturs la pli gronda dal mund. Fin l’onn 1965 muntavan las participantas ed ils participants la saira avant la cursa davent da la staziun da muntogna Allmendhubel (1907 meters sur mar) fin a la chamona da skis dal club da skis da Mürren (2432 meters sur mar) en l’Engetal. L’autra damaun vegniva surmuntà la davosa etappa fin al Schilthorn. Dapi l’onn 1968 maina la pendiculara fin al piz dal Schilthorn. Oz è il dumber da las participantas e dals participants limità a 1850 persunas e mintga onn ston vegnir refusadas plirs tschients persunas. Per gronda part vegn tratga la sort per determinar tgi che po prender part a la cursa. Il percurs, ch’ins dastga duvrar er ordaifer la cursa, ha oz ina lunghezza da 14,9 kilometers ed in profil da 2170 meters d’autezza. Talmain attractivs è el pervia da sia topografia zunt variada. Realisada vegniva la cursa ditg dals dus clubs da skis da Mürren e da Lauterbrunnen. Oz organisescha l’uniun «Internationale Inferno-Skirennen Mürren», fundada l’onn 1999, las occurrenzas da l’emna Inferno, e quai cun il sustegn da 200 fin 300 funcziunarias e funcziunaris en uffizi d’onur ch’appartegnan per gronda part als clubs da skis locals.

La cursa da skis Inferno è da gronda impurtanza per la regiun Lauterbrunnen ed oravant tut per il vitg Mürren che ha survegnì uschia in renum internaziunal. Durant tut ils onns da sia existenza ha la cursa mantegnì sia essenza ed è restada ina cursa da skis populara appreziada. En l’istorgia dal sport da skis è la cursa da skis Inferno in eveniment central – per la regiun è ella ina tradiziun fitg viva.

Gallaria d'illustraziuns

  • Cunterascensiun al Allmiboden tar il Maulerhubel a la cursa rapida da l’onn 2008 © Inferno-Rennen/Bruno Petroni
  • Il Kanonenrohr – la sfida la pli gronda (2008) © Inferno-Rennen/Bruno Petroni
  • Er crudadas datti adina puspè – qua en il Kanonenrohr (2008) © Inferno-Rennen/Bruno Petroni
  • Intgins van vestgids en il dress da cursa e cun ils skis ils pli novs, auters tschernan in equipament istoric (2009) © Inferno-Rennen/Bruno Petroni
  • Il Schilthorn furma la culissa magnifica per la cursa rapida la pli veglia dal mund (2015) © Inferno-Rennen/Bruno Petroni
  • Senza ils radund 300 funcziunaris na funcziunass nagut (2016) © Inferno-Rennen/Kurt Müller
  • Final al Winteregg (2016) © Inferno-Rennen/Kurt Müller
  • Partenza sut il Schilthorn pitschen (2017) © Inferno-Rennen/Bruno Petroni
  • Las preparaziuns – uschia per exempel la planaziun da la pista – cumenzan gia duas emnas avant la cursa, dentant dovri lavurs da pista er durant la cursa rapida (2017) © Inferno-Rennen/Bruno Petroni
  • Er las funcziunarias ed ils funcziunaris s’engaschan fermamain (2017) © Inferno-Rennen
  • La Höhenlücke cun vista sin il Kanonenrohr © Inferno-Rennen/Bruno Petroni
  • Partenza dubla (ils onns 1980) © Inferno-Rennen/Ueli Flück
  • Partenza dubla (ils onns 1980) © Inferno-Rennen/Ueli Flück
  • Las participantas ed ils participants da l’emprima cursa Inferno l’onn 1928: Sper il victur Harold Mitchell (5. da dretga) stat la dunna la pli svelta Doreen Elliott (quarta plazza). Arnold Lunn è il terz da sanestra cun egliers da sulegl © Inferno-Rennen/Kandahar Ski Club
  • Premi ambulant da la cursa rapida Inferno – cun ils nums da tut las victuras e tut ils victurs dapi l’onn 1928 © Inferno-Rennen
  • Passlung da cumbinaziun enturn Mürren – muntada da la staziun BLM al center da sport (2017) © Inferno-Rennen/Bruno Petroni
  • Er ils diavels èn da la partida – stan da vin chaud a chaschun dal passlung da cumbinaziun (2017) © Inferno-Rennen/Kurt Müller
  • Passlung da cumbinaziun enturn Mürren – las gobas da chamel zunt pretensiusas èn in’attracziun per las aspectaturas ed ils aspectaturs (2017) © Inferno-Rennen/Bruno Petroni
  • Passlung da cumbinaziun enturn Mürren – ina curta descensiun per pudair trair flad (2017) © Inferno-Rennen/Bruno Petroni
  • Duns d’onur per las meglras ed ils megliers da la cursa rapida Inferno © Inferno-Rennen
  • Buccals per las meglras ed ils megliers dal slalom gigant da cumbinaziun © Inferno-Rennen
  • Radund 300 funcziunarias e funcziunaris èn involvids (2015) © Inferno-Rennen/Kurt Müller
  • Cortegi da diavels enturn il vitg da Mürren – il diavel vegn manà al center da sport, accumpagnà da portatizuns, da stgelladers, da tamburs e da la musica da tschaiver (2013) © Inferno-Rennen/Bruno Petroni
  • Il diavel vegn ars per ch’el na possia betg manipular la cursa l’auter di (2015) © Inferno-Rennen/Bruno Petroni

Referenzas e dossier

Publicaziuns
  • James Riddel: The Ski Runs of Switzerland. London, 1957

  • Andrew Morgan: The Inferno Story. The 80 Year History of a Great Alpine Ski Race. London, 2009

  • E. A. Sautter, Fritz Stäger, Kurt Huggler: Das Inferno-Rennen 1928–1993 (www.inferno-muerren.ch/de/facts-and-figures/historisches/geschichte-details-der-anfangsjahre, 20.8.2017)

  • Kurt Huggler: Kurzgeschichte (www.inferno-muerren.ch/de/facts-and-figures/historisches/geschichte-kurzversion, 20.8.2017).

Dossier